Раздирая смехом завесу бытия 3

Эргиччи эрэйтэн, төгүрүччү түрүлүөнтэн, түҥ-таҥ олохтон төлө көппөт төлкөлөөхтөрү ыраах ыпсыбыт ырайынан уҕарытан, ыына-мээнэ оҥороллор. Уруккуну умуннаран, уһуну-киэҥи санаабат, улгум дьону уһаараллар. Момуой обургу эҥин дойҕоҕун ким ааҕа тиспитэ баарай. Барыта туолуо диэн сэрэйэн, куттал «Sуоһун» оччолорго ыыппатах буруйбутугар, бүгүн кэлэн, мэйиибит эргийиэр диэри “Mayday”, “Mayday”, “Mayday” диэн мээрилээбиппит иһин, төбөтүн оройунан аллара сурулаан иһэр көтөр аалы арбаҕастаах да абыраабат, бытырыыстаах да быыһаабат. Тэлэбииһэртэн тэйиччи, хаһыаттан халыччы түҥкэтэх түөһээҥки түүйбүтэ туолуо диэн түһээн да баттаппатах бэйэбит бабат диэммит балыыҥкалаатахпытына баппат аатырыахпыт, Момуойунан куоһурданан куолулаатахпытына куотар аакка барыахпыт. Көннөрү күлэр эрэ буоллахпыт.

Арай барытын төттөрү эргитэн кэбистэххэ: мэнээк олорууну суолталаан, күннээҕини күлүҥкээртэн күрүөлээн. Муҥ саатар бантааһыйалыын бааралаһан, онон аралдьыйан, онон иккис олохтонон олордорбут. Уста турары утарбакка, ааһары аралдьыппакка, санаа баайы ыспакка-тохпокко. Биир кэм биир киһи өйүн баайар, куруук кэрэ көстүбэт буолан хаалар, наар үчүгэй суолтата суураллар. Түҥ-таҥтан түгэҥҥэ төлө көтөн ырааҕы ыйдаҥарда, үйэлээҕи үһүйээннэһэ САТААБЫТ даҕаны улуу дьыала. Куһаҕантан сылтаан үөдүйбүт үчүгэй туһунан үһүйээҥҥэ куһаҕаны оҥорон баран үчүгэйи оҥор, оччоҕо сотуллан иһиэ буо диэбит курдук. «Оччотугар олох кырата икки төгүллээх буолуохтаах. Ээ, үс. Маҥнай куһаҕан оруолу толороҕун. Иккиһигэр онтуккун сотор курдук дьаһанаҕын. Үсүһүгэр үчүгэй киһи буолан хаалаҕын. Оччоҕо мин өссө иккитэ олорууһукпун. Туохха ыксаан». Үтүө куруук да аҕыйах. Куһаҕан арай илэ мэнээк. Куһаҕан үчүгэйдээх буолан истэҕинэ, сүүрдэммит үчүгэй да эбилик буолар.

Икки атастыылар эҥин араас киинэни көрөн, тэлэбииһэр лабысхатын истэн баран, арай, ити барыта биһиэхэ буоллун диэбиттэрэ – илэ тиийэн кэлэр. Тэлэбииһэр иһинээҕи тиллибитэ дьэ хайдах эбит? Оттон турар бэйэҥ тэлэбииһэр хартыыҥката буолан ыларыҥ тугунан дьайар эбит? «Дьиэҥ харыстаабат, күн аайы көрөр киһиҥ өлөрүүгэ уорбаланар буоллаҕына – эн билиэҥ куттанар диэн тугун. Ол киинэҕэ ойууланар, кинигэҕэ суруллар диэн оҕо оонньуута, көрүнньүк, мээнэ. Бэйэлээх бэйэҕэр көннөрүнэн хаххаланан, субу тиийэн кэллэҕинэ – билиэҥ амырыын диэн тугун...». “Билигин дьоруойдар суохтар. Билигин перевертыштар кэмнэрэ”, — диир Дьаллай тыыннаах хаалаары. Сэттэтэ да сэриилээҥ — Халдьаайыттан ыларгыт суох. Хаптаҕай тэлэбииһэргэ ол баҕас дэлэй. Ол тэлэбииһэри хайдах да эрий, иириэххэр диэри сүүс канаалы уларыта оонньоо — биири лэбэйдиир: — Эргиччи эрэй, эргиччи эрэй, эргиччи эрэй! 2005 сыл.